For å oppnå større harmonisering og føreseielegheit i vurderinga av likskap mellom varer og tenester har Patentstyret, i samarbeid med EUIPO, utarbeidd eit felles praksisdokument. Praksisdokumentet er tilpassa norske forhold, men har sitt utspring i det felleseuropeiske harmoniseringsprosjektet "Convergence Programme (CP15)", og er i tråd med det framforhandla dokumentet (eit såkalla "Common Communication") som prosjektet resulterte i.
Praksisdokumentet har som mål å auke klarleik, openheit, rettstryggleik og føreseielegheit til fordel for brukarar og styresmakter i EØS-området. Arbeidet inngår i EUIPO sin pågåande innsats for å harmonisere og samordne praksis innan immaterielle rettar i Europa. Felles forståing og retningslinjer gjer det enklare å verne varemerke på tvers av landegrenser og styrkjer samarbeidet mellom IP-styresmakter.
Hovudpunkt i CP15
Praksisdokumentet inneheld mellom anna følgjande hovudpunkt:
- Uklare og upresise varer eller tenester i ei varemerkeregistrering kan ikkje utelatast i ei vurdering av forvekslingsfare berre fordi dei er uklare eller upresise.
- Samstundes vert det lagt vekt på at innehavarar av varemerkeregistreringar til ei kvar tid skal sørgje for at registreringane oppfyller kravet til klarleik og presisjon. Praksisen oppmodar derfor til løpande oppdatering av registreringar dersom tolkinga av klarleik og presisjon i vareforteikningar endrar seg.
- Ein varemerkeinnehavar kan ikkje dra fordel av at ei registrering har ei uklar eller upresis vareforteikning.
- Dei nasjonale IP-styresmaktene vert oppmoda til å auke medvitet hos innehavarar om kravet til klarleik og presisjon.
- Dokumentet inneheld òg ei gjennomgang av dei prinsippa og faktorane ved samanlikning av varer og tenester som kan utleiast av avgjerda frå EU-domstolen i sak C-39/97, Canon, samt andre relevante faktorar.
Supplerer eksisterande praksisdokument
Dette praksisdokumentet supplerer tidlegare praksisdokument frå andre harmoniseringsprosjekt og bidreg til ei samla og heilskapleg rettleiing innan varemerkeretten.
