Om fristane våre

Når du får eit brev frå oss der vi ber deg rette ein mangel eller forklare noko som er uklart, set vi ein frist for når vi må ha fått svaret ditt.

Fristen kan variere. Det kjem an på kva vi ber om, og kvar i behandlinga søknaden er.

Det er viktig at du held fristane våre. Det gjeld både når du skal svare på brev, og når du skal betale avgifter og gebyr.

Om du ikkje held fristen, blir søknaden lagd bort, eller du mistar retten til patentet, designet eller varemerket.

Viss du ser at du ikkje rekk å svare på uttalen vår med vurdering av søknaden din innan fristen vi har gitt deg, kan du be om fristforlenging. Det må du gjere innan den opphavlege fristen går ut.

Du kan be om fristforlenging for varemerkesøknader og designsøknader på desse måtane:

1. Sjølvbetening i "Mine saker"
   Du kan forlengje fristen sjølv viss du treng meir tid. Fristen blir oppdatert med ein gong, og du får eit brev som stadfestar endringa.
   
   Logg deg inn i Mine saker
   
    
2. Skjema i Altinn eller skriftleg førespurnad
   Du kan òg bruke skjemaet for korrespondanse med Patentstyret i Altinn. Alternativt kan du sende oss e-post eller brev. Hugs å merke førespurnaden med "fristforlenging".
   
   Skjema for korrespondanse til Patentstyret

Fristforlenging for patentsøknader skjer automatisk

Du får automatisk fristforlenging på to månader utan at vi gir deg tilbakemelding. Du må derfor sjølv følgje med på den nye fristen.

Du kan få automatisk fristforlenging to gonger for éin søknad. Viss vi ikkje kan gi deg fristforlenging, får du beskjed frå oss.

I heilt ekstraordinære tilfelle blir fristforlengingar gitt når det ligg føre "særlege grunnar".

Merk at moglegheita for fristforlenging ikkje gjeld brev der vi ber deg rette formelle manglar ved levering.

For fleire typar avgifter og gebyr kan du, sjølv om du ikkje betalte innan den ordinære forfallsdatoen, framleis betale innan ein utvida frist. I nokre tilfelle må du òg betale ei tilleggsavgift.

Du kan krevje vidare behandling sjølv om du ikkje heldt fristen, viss fristbrotet var utilsikta. 

Du må gjere to ting:

1. utføre handlinga du ikkje gjorde innan fristen
2. sende eit skriftleg krav om vidare behandling